देवरियाचे उद्योगपती नरेंद्र कुमार आपल्या मुलाला शिक्षणासाठी रशियाला पाठवणार होते. व्हिसाची प्रक्रिया पूर्ण केल्यानंतर मुलाला एमबीबीएसच्या शिक्षणासाठी रशियाला पाठवता येईल या उद्देशाने मुलाला घेऊन ते दिल्लीला पोहोचणार होते. पण रशिया आणि युक्रेनमधील युद्धामुळे त्यांना आपले प्लानिंग सध्या थांबवावे लागले आहे. रशिया आणि युक्रेन हे असे देश आहेत जिथे भारतातील हजारो मुले दरवर्षी अभियांत्रिकी, वैद्यकशास्त्र शिकण्यासाठी जातात. भारतीय दूतावासाकडून मिळालेल्या माहितीनुसार, एकट्या युक्रेनमध्ये साधारण १८ हजार भारतीय विद्यार्थी तेथे शिकत आहेत. भारतात एमबीबीएसच्या ८० हजारांहून अधिक जागा असूनही मुले तिथे का जातात, असा प्रश्न उपस्थित होतो.
युक्रेनमध्ये २४ टक्के भारतीय विद्यार्थी
स्टडी इंटरनॅशनलकडून मिळालेल्या माहितीनुसार, २०११ ते २०२२ या कालावधीत भारत आणि इतर देशांमधून युक्रेनमध्ये शिकणाऱ्या विद्यार्थ्यांच्या संख्येत ४२ टक्क्यांनी वाढ झाली आहे. युक्रेनमध्ये सुमारे ७६ हजार परदेशी विद्यार्थी आहेत. त्यापैकी १८ हजार भारतीय आहेत. जे एकूण परदेशी विद्यार्थ्यांच्या २४ टक्के आहेत. युक्रेनच्या शिक्षण व्यवस्थेत भारतीय विद्यार्थ्यांचे महत्त्वाचे योगदान आहे. भारतातून युक्रेनला जाणारे बहुतांश विद्यार्थी एमबीबीएमचे शिक्षण घेत आहेत.
कमी खर्चात सहज प्रवेश
PrologAbroad वेबसाइटवरील माहितीनुसार, युक्रेनमध्ये प्रामुख्याने १८ वैद्यकीय विद्यापीठे आहेत. जिथे ६ वर्षांच्या एमबीबीएस अभ्यासक्रमासाठी २० ते २५ लाख रुपये खर्च येतो. आणि दुसरी महत्त्वाची गोष्ट म्हणजे तिथल्या अभ्यासात प्रवेश घेण्यासाठी प्रवेश परीक्षा नसते. भारतामध्ये विद्यार्थ्यांना नीट परीक्षेला बसावे लागते. आणि त्यात मिळालेल्या स्कोअरकार्डवरूनच प्रवेश दिला जातो. भारतात प्रवेशासाठी अधिक गुणवत्ता लागते. थोडक्यात मेडिकलच्या प्रवेशासाठी भारतात खूप मोठी स्पर्धा आहे. त्यामुळे जी मुले भारतात पात्र होऊ शकत नाहीत ते युक्रेनमध्ये प्रवेश घेण्यास प्राधान्य देतात असे सांगितले जाते.
भारतातील खासगी महाविद्यालयातून एमबीबीएस पदवीचा अभ्यास करण्यासाठी ५० ते ६० लाख रुपये खर्च येतो. सरकारी महाविद्यालयांमध्ये ८ ते १० लाख रुपये खर्च होतो आणि हा प्रवेश मिळविणे देखील कठीण असते. या तुलनेत युक्रेनमध्ये हा खर्च कमी आहे. त्यामुळे युक्रेनला जाणाऱ्या विद्यार्थ्यांची संख्या वाढत आहे.