काऊन्सिलने जाहीर केलेल्या आयसीएसई सेमिस्टर २ च्या वेळापत्रकानुसार, इयत्ता दहावी आणि बारावीच्या दुसऱ्या सत्राच्या परीक्षेसाठी विद्यार्थ्यांना प्रत्येक विषयाची प्रश्नपत्रिका वाचण्यासाठी अतिरिक्त १० मिनिटे दिली जाणार आहेत. परीक्षेचा कालावधी १ तास ३० मिनिटांव्यतिरिक्त हा वेळ असेल.
ICSE आणि ISC च्या परीक्षा २५ एप्रिलपासून
देशातील करोना प्रादुर्भावाच्या पार्श्वभूमीवर आयसीएसई बोर्डातर्फे २०२१-२२ या वर्षासाठी दहावी आणि बारावीच्या परीक्षांची घोषणा करण्यात आली.
यानुसार पहिल्या सत्राच्या परीक्षा नोव्हेंबर-डिसेंबर २०२१ दरम्यान घेण्यात आल्या. दहावी, बारावी परीक्षेचा दुसरा टप्पा म्हणजेच सेमिस्टर २ च्या परीक्षा आता २५ एप्रिलपासून होणार आहेत. २० मेपर्यंत या परीक्षा सुरू राहणार आहेत. आयएससी परीक्षा ६ जूनपर्यंत होणार आहेत. काऊन्सिलच्या अधिकृत वेबसाइट cisce.org वर दिलेल्या लिंकवरून किंवा खाली दिलेल्या थेट लिंकवरून विद्यार्थी आयसीएसई सेमिस्टर २ चे वेळापत्रक डाउनलोड करून विषयनिहाय परीक्षेच्या तारखा माहिती करुन घेऊ शकतात.
ICSE and ISC SEM 2 2022: वेळापत्रक पाहण्यााठी ‘येथे’ क्लिक करा
सकाळी दहावीची आणि दुपारी बारावीची परीक्षा
आयसीएसईने जाहीर केलेल्या वेळापत्रकानुसार, इयत्ता दहावीची परीक्षा सकाळच्या शिफ्टमध्ये घेतली जाईल. जी सकाळी ११ वाजता सुरू होईल. मात्र, विद्यार्थ्यांना सकाळी १० वाजून ५० मिनिटांनी प्रश्नपत्रिका दिली जाणार आहे. इयत्ता बारावीचे सर्व पेपर दुपारी २ वाजल्यापासून होतील. ज्यासाठी दुपारी १ वाजून ५० मिनिटांनी प्रश्नपत्रिका वितरित केल्या जातील.
सीबीएसई वेळापत्रकासंदर्भात अपडेट
केंद्रीय माध्यमिक शिक्षण मंडळाद्वारे (Central Board of Secondary Education, CBSE) टर्म २ परीक्षांचे सविस्तर वेळापत्रक लवकरच जाहीर केले जाणार आहे. माध्यमिक वर्गांच्या दुसऱ्या टप्प्यातील परीक्षांचे वेळापत्रक तसेच उच्च माध्यमिक वर्गांच्या टर्म २ परीक्षांचे वेळापत्रक अधिकृत वेबसाइट cbse.nic.in वर जाहीर करण्यात येणार आहे. याआधी सीबीएसई बोर्डाने २६ एप्रिलपासून परीक्षा सुरु होणार हे जाहीर केले होते. पण विषयानुसार परीक्षांचे वेळापत्रक जाहीर करण्यात आले नव्हते.