सीयूईटी वर्षातून दोनवेळा? UGC चे अध्यक्ष म्हणाले…

वृत्तसंस्था, नवी दिल्ली

केंद्रीय विद्यापीठांमधील प्रवेशासाठी घेण्यात येणारी परीक्षा (CUET) पुढील शैक्षणिक वर्षापासून वर्षातून दोनवेळा घेण्याचा विचार (Cuet Twice In Year) विद्यापीठ अनुदान आयोगाचे (UGC) अध्यक्ष जगदेश कुमार यांनी बोलून दाखवला आहे.

केंद्रीय विद्यापीठांच्या अभ्यासक्रमांना प्रवेश मिळवण्यासाठी विद्यार्थ्यांना सीयूईटी परीक्षा द्यावी लागते. ही परीक्षा राष्ट्रीय परीक्षा संस्था (एनटीए) आयोजित करते. संस्थेने ही परीक्षा वर्षातून दोनवेळा घेण्यासंदर्भात विचार सुरू केला आहे, अशी माहिती कुमार यांनी दिली. केंद्रीय विद्यापीठांकडे असणारा विद्यार्थ्यांचा वाढता कल व त्याविरोधातील मते कुमार यांनी खोडून काढली. ‘सीयूईटीमुळे राज्यांच्या परीक्षा व्यर्थ ठरणार नाहीत. तसेच यामुळे कोचिंग क्लासची संस्कृती फोफावण्याचीही शक्यता नाही’, असे मत कुमार यांनी व्यक्त केले. ‘भविष्यात सीयूईटी केवळ केंद्रीय विद्यापीठांतील प्रवेशासाठी मर्यादित राहणार असल्याचा समजही चुकीचा आहे. अनेक प्रतिष्ठित खासगी विद्यापीठे केंद्रीय शिक्षण मंडळाशी संलग्न होण्याच्या प्रयत्नात आहेत. पदवीपूर्व अभ्यासक्रमांच्या प्रवेशासाठी सीयूईटीची गुणांकन पद्धत अवलंबण्याचाही त्यांचा प्रयत्न आहे’, याकडे त्यांनी लक्ष वेधले.

खासगी विद्यापीठांमुळे यापुढे सीईयूटी परीक्षा दोन वेळा आयोजित करण्याचा विचार आहे. यामुळे ही परीक्षा केवळ केंद्रीय विद्यापीठांसाठीच मर्यादित राहणार नाही. तर खासगी विद्यापीठांमधील प्रवेशासाठीही सीईयूटी परीक्षा घेण्याचे प्रयत्न सुरू आहेत. सीईयूटीच्या प्रक्रियेनुसारच या खासगी अभ्यासक्रमांमध्ये विद्यार्थ्यांना प्रवेश दिला जाईल, असेही त्यांनी स्पष्ट केले.

कुमार यांनी गेल्या आठवड्यात बारावीच्या गुणांबाबत केलेल्या भाष्यामुळे देशभरातील राज्य मंडळाच्या विद्यार्थ्यांमध्ये चिंता व्यक्त होऊ लागली होती. देशातील ४५ केंद्रीय विद्यापीठांमध्ये प्रवेश घेण्यासाठी यापुढे बारावीचे गुण नव्हे, तर सीईयूटीमध्ये मिळालेले गुणांकन गृहीत धरले जाईल. केंद्रीय विद्यापीठे आपल्या अभ्यासक्रमांच्या प्रवेशासाठी स्वतंत्र निकष-नियमही आखू शकतात, असे त्यांनी म्हटल्याने वाद निर्माण झाला होता.

बारावीच्या अभ्यासक्रमावरच परीक्षा

केंद्रीय प्रवेश परीक्षेची तयारी करण्यासाठी कोचिंग क्लासची संस्कृती फोफावेल काय, याविषयी कुमार विचारले असता, ‘या परीक्षेसाठी कोचिंगची आवश्यकताच नाही. त्यामुळे कोचिंग क्लासची संस्कृती फोफावण्याचा मुद्दाही गैरलागू आहे. ही परीक्षा संपूर्णपणे बारीवाच्या अभ्यासक्रमावर आधारित असेल’ असे ते म्हणाले. परीक्षेमध्ये अकरावीच्या अभ्यासक्रमाच्या प्रश्नांचाही समावेश असणार काय, असे विचारले असता, कुमार यांनी स्पष्ट शब्दांमध्ये नकारार्थी उत्तर दिले. त्यामुळे विद्यार्थ्यांवरील मोठा ताण दूर झाला आहे.

Jmi Phd Admission 2022: जामिया मिलिया इस्लामियातील पीएचडी प्रवेश १ एप्रिलपासून

CUET 2022: केंद्रीय विद्यापीठांमधील UG अभ्यासक्रमांच्या सीईटीचे अर्ज २ एप्रिल पासून